Өзбекстан Мәдениет министрі Озодбек Назарбеков Әндіжан қаласында өтетін IV Халықаралық ТҮРКСОЙ театр фестивалі мен «2026 жылғы түркі әлемінің мәдени астанасы» іс-шараларына дайындық барысын тексерді.
Іс-сапар аясында министр халықаралық мәдени шаралар өтетін орындарды аралап, атқарылып жатқан жұмыстармен танысты. Атап айтқанда, Әндіжан облыстық музыкалық драма театрында жүргізіліп жатқан реставрация, инфрақұрылымды модернизациялау және техникалық жаңарту жұмыстарын бақылады. Сондай-ақ театрдың халықаралық деңгейдегі шараларды қабылдауға дайындығы бойынша жауапты тұлғалардың есептерін тыңдады.
Театрдың шығармашылық ұжымымен кездесу барысында Озодбек Назарбеков алдағы мәдени бағдарламалардың жоғары стандарттарға сай ұйымдастырылуы маңызды екенін атап өтті. Министрдің айтуынша, сахналанатын қойылымдар мен өткізілетін шаралар түркі халықтары арасындағы бауырластық байланыстар мен мәдени интеграцияны нығайтуға ықпал етеді.
Сонымен бірге министр Әндіжанда жыл бойы өтетін барлық мәдени іс-шаралардың жоғары деңгейде ұйымдастырылатынына сенім білдіріп, ұйымдастырушылар мен театр ұжымына сәттілік тіледі.
