McDonald’s Қазақстаннан кететін болды
Food Solutions KZ ЖШС басқаратын McDonald's жылдам тамақтану бренді жұмысын тоқтатады.
McDonald’s жылдам тамақтану желісі Қазақстандағы қызметін тоқтатады, деп хабарлайды Turanews.kz.
«Оған себеп — ет жеткізудегі шектеулер. Жақын арада жаңа атаумен жылдам тамақтану мейрамханалары қайта ашылады. Ашылу мерзімі қосымша жарияланады», — деп хабарлады Қазақстандағы McDonald’s баспасөз қызметі.
«Компания жұмысының қайта жандануы және жылдам қызмет көрсететін мейрамханалардың жаңа атаумен ашылу мерзімі туралы жақын уақытта жарияланатын болады. Біз осы ауысым жүзеге асқаннан кейін, компанияның өз жұмысын жалғастыруына байланысты барлық сұрақтарға жауап береміз.
Мейрамханалар желісі ашылғаннан кейін келушілерге жоғары сапалы өнімдер, түрлі мәзір мен қонақжай қызмет ұсынылады. Жылдам қызмет көрсететін мейрамханалар қолданыстағы жоғары стандарттарға, құндылықтарға және бизнес принциптеріне сәйкес жұмысын жалғастырады», — делінген ресми хабарламада.
Айта кетейік, былтыр қарашада McDonald’s-тың Қазақстандағы мейрамханалары жұмысын уақытша тоқтатқан болатын.
