Еліміздегі букмекерлік кеңселерден ұтыс сомасын шығару және шотты толықтыру қызметі уақытша тоқтатылды.
Мәселен, «NetBet» құрамына кіретін Olimpbet кеңсесі 4 ақпан күні кешкі уақытта төлемдердің кідіртілгенін хабарлады. Компания өкілдерінің айтуынша, бұл шешім Ұлттық банктен арнайы нұсқау түскенге дейін күшінде болады.
Мұндай шектеулер нарықтағы өзге де ірі ойыншыларға, соның ішінде 1xbet (UAK A компаниясы) порталына да әсер еткен. Көптеген платформалар мұны техникалық іркілістермен немесе заңнамалық талаптармен түсіндіруде.
Бұл шешімнің себебі неде?
2025 жылдың қазан айында Туризм және спорт министрлігі мен Ұлттық экономика министрлігі құмар ойын саласына қатысты ережелерді қатаңдатқан болатын. Жаңа реттеу бойынша, барлық букмекерлік мекемелер бірыңғай есеп жүйесіне біріктірілуі тиіс. Үкімет бұл қадам арқылы қаржылық ағындардың ашықтығын қамтамасыз етіп, әрбір транзакцияны бақылауға алуды көздейді.
Қаржы министрлігінің дерегіне сүйенсек, Қазақстанда ресми тіркелген 20-ға жуық кеңсе бар және 700 мыңға жуық отандасымыз осы қызметті тұрақты пайдаланады.
