Еуропа лигасында ширек финалға қай командалар шықты?
Кеше, 26 ақпан күні Еуропа лигасының плей-офф кезеңіндегі қарымта матчтар аяқталды. Осы сатыда бақ сынаған 16 команданың ішінен сегіз үздік ұжым келесі айналымға жолдама алды.
Жалпы есепте басым түскен «Ноттингем Форест» (Англия), «Болонья» (Италия), «Сельта» (Испания) және «Штутгарт» (Германия) сияқты клубтар жарысты жалғастыру мүмкіндігіне ие болды.
Кешегі өткен қарымта кездесулердің нәтижелері:
-
«Генк» — «Динамо Загреб»: 3:3 (алғашқы ойын 3:1). Бельгиялықтар қос матчтың қорытындысы бойынша алға шықты.
-
«Болонья» — «Бранн»: 1:0 (1:0). Италиялық клуб екі ойында да қарсыласынан айласын асырды.
-
«Сельта» — ПАОК: 1:0 (2:1). Испаниялықтар грек клубын қапы қалдырды.
-
«Ноттингем Форест» — «Фенербахче»: 1:2 (3:0). Кеше жеңілгеніне қарамастан, бірінші ойындағы ірі есеп ағылшындарды келесі кезеңге алып шықты.
-
«Ференцварош» — «Лудогорец»: 2:0 (1:2). Венгрлер өз алаңында қажетті есепке қол жеткізді.
-
«Штутгарт» — «Селтик»: 0:1 (4:1). Неміс ұжымы бірінші матчтағы басымдығын сақтап қалды.
-
«Црвена Звезда» — «Лилль»: 0:2 (1:0). Француздар сырт алаңда сенімді жеңіске жетіп, жалпы есепте басым түсті.
-
«Виктория Пльзень» — «Панатинаикос»: 1:1 (2:2). Бұл жұпта жеңімпаз пенальти сериясында анықталып, грек клубының жолы болды (3:4).
Естеріңізге сала кетейік, топтық кезеңде бірінші орын алған сегіз команда 1/8 финалға тікелей жолдама алып, кешегі ойындардың нәтижесін күткен болатын. Олар:
-
«Олимпик Лион», «Астон Вилла», «Мидтьюлланн», «Реал Бетис», «Порту», «Брага», «Фрайбург» және «Рома».
Еуропа лигасының биылғы маусымы 20 мамыр күні Ыстанбұлдағы (Түркия) «Бешикташ» стадионында өтетін финалмен түйінделеді.
