Түркияда құқық қорғау органдары ауқымды операция жүргізіп, «Ислам мемлекеті» террористік ұйымына (Қазақстанда тыйым салынған — ред.) қатысы бар деген күдікке ілінген 115 адамды ұстады, деп хабарлайды TuraNews.kz.
Euronews мәліметінше, тергеу аясында 137 адамға қатысты қамауға алу туралы ордер беріліп, қала бойынша 124 мекенжайда тінту жүргізілген. Нәтижесінде күдіктілерден тапаншалар, оқ-дәрілер және түрлі құжаттар тәркіленді.
Тергеу дерегіне сәйкес, күдіктілер Сириядағы қақтығыс аймақтарында орналасқан ИГИЛ лаңкестік ұйымының мүшелері мен олардың отбасыларына қаржылай көмек көрсету арналары арқылы анықталған.
Түркияның Бас прокуратурасы таратқан ақпаратта күдіктілердің алдағы Рождество мен Жаңа жыл мерекелері қарсаңында мұсылман емес азаматтарға қарсы әрекеттерге үгіттегені айтылған. Ұсталғандардың бір бөлігі бұрын қақтығыс аймақтарында болған, ал кейбіріне терроризм баптары бойынша ұлттық және халықаралық деңгейде қамауға алу туралы ордер жарияланған.
Қашып жүрген өзге күдіктілерді ұстау жұмыстары жалғасып жатқаны хабарланды.
