Ұлытау облысында өндірістік нысандарды қайта жаңғырту: Жезқазғандағы тігін фабрикасының инфрақұрылымын жетілдіру жұмыстары басталды
Ұлытау облысының әкімі Дастан Рыспеков Жезқазған қаласындағы бұрынғы тігін фабрикасы ғимаратында болып, нысанның қазіргі жағдайымен және оны қайта жаңғыртуға бағытталған жұмыстардың барысымен танысты. Бұл нысан өңірдің өндірістік және әлеуметтік инфрақұрылымын дамытуға бағытталған маңызды жобалардың бірі саналады.
Сапар барысында өңір басшысы инженерлік-коммуникациялық инфрақұрылымды қамтамасыз ету мәселелері бойынша жауапты мекемелер өкілдерімен жұмыс кеңесін өткізді. Кеңеске қатысушылар ғимаратты тиімді пайдаланудың ықтимал бағыттарын, сондай-ақ оны өңір үшін әлеуметтік маңызы бар жобаларға бейімдеу тетіктерін талқылады.
Әкімдік тарапынан қойылған басты міндеттердің бірі – нысанды толыққанды инфрақұрылыммен қамтамасыз ету. Жиында электр, жылу, су және кәріз желілерін жаңарту қажеттілігі қарастырылып, инженерлік жүйелерді реттеу бойынша нақты ұсыныстар берілді.
Кеңес қорытындысы бойынша облыс әкімі барлық жауапты органдарға қысқа мерзім ішінде нысанды қалпына келтіру және тиімді пайдалану бойынша кешенді жол картасын әзірлеуді тапсырды. Жол картасында инженерлік жүйелерді жаңарту, ғимараттың құрылымдық жағдайын тексеру, қауіпсіздік талаптарын қамтамасыз ету және әлеуметтік бағыттағы жобаларды орналастыру мүмкіндіктері қамтылмақ.
Бұл бастама әкімдік тарапынан өңірдің экономикалық және әлеуметтік инфрақұрылымын дамытуға
бағытталған жүйелі жұмыстардың маңызды бөлігі болып табылады. Өңірдегі бос тұрған өндірістік нысандарды қайта жандандыру — жаңа жұмыс орындарын құруға, кәсіпкерлікті қолдауға және қала инфрақұрылымын жақсартуға мүмкіндік береді.
Айта кетейік, бұрынғы тоқыма фабрикасының ғимараты бұған дейін «Ұлытау» әлеуметтік-кәсіпкерлік корпорациясының балансына берілген болатын. Қазіргі уақытта нысанды қайта жаңғырту жұмыстарын жүргізетін мердігер ұйым анықталып, жобалау және дайындық жұмыстары басталып кетті.
