Президент Жолдауын іске асыру: Шығыста негізгі басымдықтар анықталды
Бүгін Өскемен қаласында Шығыс Қазақстан облысы жұртшылығының қатысуымен Қазақстан Республикасының Президенті Қасым-Жомарт Тоқаевтың «Жасанды интеллект дәуіріндегі Қазақстан: өзекті мәселелер және оны түбегейлі цифрлық өзгерістер арқылы шешу» атты Жолдауын талқылауға арналған жиын өтті.
Жиынға облыстық басқармалар басшылары, депутаттар, саяси партиялар филиалдарының өкілдері, облыстық қоғамдық кеңес мүшелері, азаматтық сектор өкілдері, сондай-ақ онлайн-режимде қосылған қала мен аудан әкімдері қатысты.
Облыс әкімі Нұрымбет Сақтағанов Мемлекет басшысының Жолдауы – жай ғана бағдарламалық құжат емес, жаңа тарихи жағдайда мемлекеттік саясаттың стратегиялық бағдары мен идеологиялық негізі екенін атап өтті.
– Президент мемлекеттік саясаттың орталығында адам, оның құқықтары мен әл-ауқаты тұруы керектігін айқын жеткізді. Қазақстан орнықты, бәсекеге қабілетті, әділетті әрі жоғары технологиялы мемлекетке айналуы тиіс. Ерекше назар өңірлерге аударылды. Өйткені реформалар тек астанада ғана емес, жергілікті жерлерде де жүзеге асады. Шығыс Қазақстан облысы қуатты өнеркәсіптік, аграрлық, туристік және зияткерлік әлеуетке ие, біз Президент бастамаларын орындауда көшбасшылардың қатарында болуымыз қажет, – деді әкім.
Өз сөзінде ол жүзеге асырылуы тиіс жеті негізгі міндетті атап өтті:
1. ерекше экономикалық аймақтарды дамытуға басымдық бере отырып, ауқымды инвестициялар тарту;
2. өңдеу өнеркәсібін дамыту және ішкі және сыртқы нарықтарға бәсекеге қабілетті өнім шығару;
3. ауыл шаруашылығын жаңа деңгейге шығару, агрохабтар мен логистикалық орталықтарды дамыту, шетелдік инвесторлармен стратегиялық серіктестік орнату;
4. көлік-логистика жүйесі мен туристік инфрақұрылымды дамыту;
5. тұрғын үй-коммуналдық шаруашылық пен су инфрақұрылымын жаңғырту;
6. цифрлық дамуды ынталандыру, мұнда кәсіпкерлер трансформацияның негізгі қозғаушы күші болуы тиіс;
7. «Келешек мектептері» ұлттық жобасы аясында және жасанды интеллект пен цифрлық технологиялар саласында мамандар даярлау арқылы адами капиталды дамыту.
Әкім цифрландыру мәселелеріне ерекше тоқталды.
– Президент жасанды интеллект дәуірінде Қазақстанға уақытпен қатар жүру ғана емес, жаһандық технологиялық үдерістердің белсенді қатысушысына айналу маңызды екенін атап өтті. Ол үшін өнеркәсіптен және ауыл шаруашылығынан бастап медицина, білім беру және мемлекеттік басқаруға дейін барлық салада цифрлық трансформацияны жеделдету қажет. Шығыс Қазақстан облысы осындай шешімдерді енгізетін алаңға айналуға дайын, – деді Нұрымбет Сақтағанов.
Талқылау қорытындысы бойынша нақты тапсырмалар берілді: 2027 жылға дейінгі жасанды интеллект дамуының өңірлік «жол картасын» әзірлеу, аймақтық IT-қоғамдастық құру, экономиканы әртараптандыру және кәсіпкерлікті қолдау жұмыстарын жалғастыру, сондай-ақ су шаруашылығы инфрақұрылымын жаңғырту шараларын күшейту.
Әкім өңірде адами капиталды дамытуға бағытталған жұмыстар атқарылып жатқанын атап өтті: жаңа мектептер мен колледждер ашылып, медициналық мекемелер жаңғыртылуда, мәдениет пен спорт саласы дамып келеді. Патриотизм мен құқықтық тәртіп мәселелеріне де айрықша көңіл бөлінуде.
– Құқықтық тәртіп, мінез-құлық мәдениеті және бірлік – бұл біздің мемлекеттілігіміздің негізі. Президент қоғам заңсыздық пен агрессияға төзбеуі керектігін нақты айтты. Жастарға мінез-құлық мәдениетін және Отанға деген сүйіспеншілікті білім, жасампаздық және елдің дамуына қосқан үлес арқылы тәрбиелеу маңызды, – деді әкім.
Сөзінің соңында облыс әкімі:
– Біздің алдымызда маңызды міндет тұр – Шығыс Қазақстан облысын орнықты даму жолына шығару, оны жаңа мүмкіндіктер мен жоғары өмір сапасының орталығына айналдыру. Облыс тұрғындары Президент бастамаларын белсенді қолдап, Әділетті әрі Қуатты Қазақстанды құруға өз үлесін қосатынына сенімдімін, – деп қорытындылады.
