Оның айтуынша, қазір Нарын облысында жалпы сомасы 15 млрд сом болатын 127 ірі жоба жүзеге асырылып жатыр.
— Бұл қаражатты игеру және құрылысты аяқтау үшін техника мен жұмыс күші қажет. Біздің азаматтар табыс табу үшін шетелге кетіп, өзге елде мигрантқа айналады. Олар елге оралуы тиіс. Президент өз сөздерінің бірінде мигранттарды елге қайтаратынымызды айтқан. Міне, ол уақыт келді. Олар құрылыс алаңдарында еңбек етіп, арнайы техниканы басқарып, халыққа қызмет ете алады. Біздің азаматтарға арналған жұмыс өте көп. Қазір жұмыс күші жетіспейді, — деп атап өтті қауіпсіздік қызметінің басшысы.
Қамчыбек Ташиев сондай-ақ Нарын облысында екі бетон зауыты салынғанын, олардың бірінің жұмысы сапасыз бетонға байланысты тоқтатылғанын айтты.
— Материал мен шикізат жетіспейді. Бұл ұзақ уақыт бойы болмаған құрылыс көлемінің артуының айқын белгісі, — деді ол.
Қауіпсіздік қызметінің басшысы Өзбекстан және Тәжікстанмен шекараны делимитациялау аяқталғаннан кейін билік ішкі мәселелерді шешуге кіріскенін ерекше атап өтті.
— Қырғызстан шын мәнінде егемен мемлекетке айналды. Біз бұл туралы 30 жыл бойы айтып келсек те, шекарамыз ұзақ уақыт бойы ашық болды. Қай жердің бізге, ал қайсысының көршілерге тиесілі екенін білмедік. Енді әрбір метр жер бекітілген соң, ірі ішкі мәселелерді шешуге кірісеміз. Құрылыс жұмыстары тек Нарын облысында ғана емес, бүкіл ел бойынша жүргізіліп жатыр, — деді ол.
Қ.Ташиев қазан айында Нарынға қайта келіп, құрылыс жұмыстарының сапасы мен жолдардың жағдайын бағалайтынын мәлімдеді.
