ШҚО Әкімі Нұрымбет Сақтағанов жұмыс сапарымен Самар ауданына барды
Шығыс Қазақстан облысының әкімі Нұрымбет Сақтағанов Самар ауданына жасаған жұмыс сапары барысында әлеуметтік және инженерлік инфрақұрылымның маңызды нысандарын аралап, даму басымдықтарын айқындап, жергілікті тұрғындармен кездесті.
Ауданның әкімшілік ғимараттарының жай-күйіне ерекше назар аударылды. Өңір басшысы төтенше жағдайлар бөлімі, полиция бөлімі, аудандық сот, кітапхана және Самар ауылшаруашылық-техникалық колледжінің жатақханасын аралау барысында бұл нысандардың техникалық жағдайының қанағаттанарлықсыз екенін атап өтті. Ең алдымен, ТЖ және полиция ғимараттарын күрделі жөндеуден өткізу үшін жобалық-сметалық құжаттама дайындау тапсырылды.
Ауданда кәсіпкерлікке жағдай жасауға да ерекше көңіл бөлінуде. Туризм саласы басым бағыт ретінде қарастырылуда. Бұқтырма су қоймасының осы бөлігінде демалысты дамытуға бағытталған көптеген стартаптар мен бизнес-жобалар жүзеге асырылып жатыр. Биыл Песчанка ауылына дейінгі 30 шақырым жолды жөндеу жоспарланған, бұл көлік қатынасының қолжетімділігін арттырып, туристік белсенділікке қолайлы жағдай жасайды. Мемлекет бұл саладағы жобаларды іске асыруға жан-жақты қолдау көрсетуге дайын.
Сапардың маңызды нүктелерінің бірі – Кеңес Одағының үш Батыры дүниеге келген Подгорное ауылы болды. Өңір басшысы мұнда өткен еске алу шараларына және батырларға арналған ескерткішке гүл шоқтарын қою рәсіміне қатысты.
– Еліміздегі әр ауыл мұндай қаһарман перзенттерімен мақтана алмайды. Сондықтан да мұндағы инфрақұрылым соған лайықты болуы тиіс. Палатцы ауылынан Подгорное ауылына дейінгі 18 шақырым және Қаракөл ауылына дейінгі 20 шақырым жолды жөндеу туралы шешім қабылданды, – деді облыс әкімі.
Аудан дамуы әлеуметтік саланы жаңғырту бағыты бойынша да жалғасады. Халық санының өсуіне байланысты 150 орындық жаңа мектеп салу жобасы әзірленіп жатыр. Сонымен қатар, мәдениет пен спорт нысандарын қалпына келтіру арқылы тұрғындардың бос уақытын өткізуге жағдай жасалады.
Кездесу барысында су мәселесі де көтерілді. Самар ауданындағы су қоймасы күрделі жөндеуді қажет етеді. Бұл шара суармалы жер көлемін 500 гектардан 1200 гектарға дейін ұлғайтуға мүмкіндік береді. Аталған жобаның егжей-тегжейін пысықтап, келесі аптада салалық мамандармен арнайы жиын өткізу тапсырылды.
Ұлы Жеңістің 80 жылдығына орай тыл ардагерлері Елизавета Бикбаева мен Курма Жетеневаға Қазақстан Республикасы Президентінің «Ұлы Отан соғысындағы Жеңіске 80 жыл» медалі табыс етілді.
– Сіздердің ерліктеріңіз – мәңгілік, ал рухыңыз – барша ұрпаққа үлгі, – деді Нұрымбет Сақтағанов, Курма апаның 100 жылдық мерейтойына өзі келетінін уәде етіп.
