Kazinform агенттігінің хабарлауынша, дүйсенбі күні мұнай бағасы өсті, бұл АҚШ-тың йемендік хуситтерге қарсы соққыларын жалғастыратыны туралы мәлімдемесімен байланысты. Вашингтон хуситтер халықаралық теңіз тасымалына шабуыл жасауды тоқтатпайынша, операцияны жалғастыратынын хабарлады. Сондай-ақ, мұнай нарығына Қытайдың оң экономикалық көрсеткіштері де қолдау көрсетті, бұл сұраныстың артуына үміт ұялатты.
АҚШ-тың хуситтерге әуе соққылары сенбі күні басталды — бұл олардың Қызыл теңіздегі шабуылдарына жауап болды. АҚШ бұл операция бірнеше аптаға созылуы мүмкін екенін айтты, ал хуситтер қарсы шаралар қабылдайтынын ескертті.
Дүйсенбіде Brent маркалы мұнайдың фьючерстері 63 центке (0,9%) қымбаттап, бір баррель үшін 71,21 долларға жетті. WTI маркалы америкалық мұнайдың бағасы да 62 центке (0,9%) өсіп, 67,80 доллар болды.
Қытай экономикасының көрсеткіштері мұнай нарығының нығаюына әсер етті. Қаңтар-ақпанда бөлшек сауда көлемі артты, бұл Бейжіңнің ішкі тұтынуды ынталандыруға ұмтылысын растайтын оң белгі. Дегенмен, жұмыссыздықтың өсуі мен өнеркәсіптік өндірістің төмендеуі алаңдаушылық туғызып отыр.
UBS сарапшысы Джованни Стауново Reuters агенттігіне «Қытай экономикасына қатысты күткеннен жақсы деректер, ықтимал ынталандыру шаралары және Таяу Шығыстағы шиеленістің қайта өршуі мұнай бағасының өсуіне әсер етіп жатыр. Бірақ жеткізуде айтарлықтай үзілістер байқалмайды» дегенді айтты.
— Мұнайдың физикалық нарығы салыстырмалы түрде тұрақты болып тұр. Қысқа мерзімді фьючерстердің бағасы ұзақ мерзімділерден жоғары, бұл ұсыныстың жетіспеушілігін көрсетеді. Сатып алушылар жедел жеткізілім үшін көбірек төлеуге дайын, — деді PVM брокерлік компаниясының сарапшысы Тамас Варга.
Өткен аптада мұнай бағасы біршама өсті, алайда жыл басынан бері Brent маркалы мұнай 5%-ға арзандады. Бұл АҚШ пен басқа елдер арасындағы сауда шиеленісінің жаһандық экономиканың баяулауына әкелуі мүмкін деген қауіппен байланысты.
ОПЕК+ сәуір айынан бастап мұнай өндіруді тәулігіне 138 000 баррельге арттыру туралы шешім қабылдады, бұл да мұнай бағасына қысым көрсетуде. Бірақ Saxo Bank сарапшысы Оле Хансеннің пікірінше, АҚШ-тың Иранға қарсы санкцияларын қатаңдатуы осы факторды теңестіруі мүмкін.
— Қытайдың ішкі сұранысты ынталандыру жоспары, сондай-ақ Қызыл теңіздегі жағдайға байланысты жаңа қауіп-қатерлер мұнай нарығын қолдап отыр, — деп атап өтті сарапшы.
АҚШ-тың сауда саясатына қатысты белгісіздік пен экономикалық перспективаларға деген алаңдаушылық мұнай бағасының өсу мүмкіндіктерін шектейді деді Pepperstone сарапшысы Дилин Ву.
Украинадағы қақтығысты реттеу перспективасы да нарыққа әсер етті. АҚШ президенті Дональд Трамп сейсенбі күні Ресей президенті Владимир Путинмен келіссөздер жүргізіп, соғысты тоқтату бойынша ықтимал қадамдарды талқылауды жоспарлап отыр.
Халықаралық энергетикалық агенттік өткен аптада ескерту жасады: 2025 жылы мұнай өндірісі сұраныстан тәулігіне шамамен 600 000 баррельге асып кетуі мүмкін. Бұл АҚШ-тағы рекордтық өндіріс деңгейіне және әлемдік сауда шиеленісіне байланысты сұраныстың төмендеуіне байланысты болжанып отыр.
Алдын ала мәліметтер бойынша, АҚШ-тың Йемендегі хуситтерге жасаған әуе соққылары салдарынан 53 адам қаза тауып, 98 адам жарақат алды. Бұл туралы хуситтердің денсаулық сақтау министрлігі хабарлады.
