Ясауи университетінің 30 жылдығы тойланды

Түркістан қаласында өткен концертке  түркі әлемі елдерінің 40 университетінен ректорлар мен өкілдер, Қожа Ахмет Ясауи университетінің ректоры, ректордың орынбасары, Шетелдегі түріктер және ағайын қауымдастықтар басқармасы төрағасы, сондай-ақ көптеген қонақ пен студент қатысты.

Концерт екі елдің мемлекеттік әнұрандарының орындалуымен басталды.

Одан кейін шараны ашқан университет ректоры Жанар Темірбекова бұл күннің маңыздылығына тоқталып, қатысушыларға алғысын білдірді.

«Өздеріңіз білетіндей, биыл Халықаралық Қожа Ахмет Ясауи университетіне 30 жыл толды. Ал 30 жылдық мерейтойға орай біз жыл бойына осынау тамаша датаны түрлі шаралармен атап өттік. Оның ішінде 30 маңызды жоба болды. Өте маңызды конференциялар мен іс-шаралар ұйымдастырылды» деді ол.

Университет ректорының орынбасары Женгиз Томар Қожа Ахмет Ясауи университетінің түрік-қазақ достығының алғашқы нақты үлгісі екеніне назар аударды. «Әрине мен өте қуаныштымын, бұл 30 жылдық университет. Бұл университет — қазақ-түрік достығының алғашқы нақты үлгісі. Өздеріңіз білесіздер, Қазақстан 30 жыл бұрын тәуелсіздік алып, бұл университет 6 айдан кейін құрылған. Бұл тұрғыда өте маңызды. Түрік әлемі университеті ретіндегі нақты жоба. Бұл қала да мен келгенде 2018 жылы шағын қала болды, бірақ соңғы жылдары ол керемет өсті. Мұнда университеттің де үлесі зор» деді ол.

Соңғы бір-екі жылда университет ретінде үлкен жетістікке жеткендерін айтқан Томар университеттің мақсаттарына да тоқталды.

Ол  «Төрт тілде сөйлейтін студенттер өте көп және Қазақстанда жұмысқа орналасу көрсеткіші 85% құрайды. Бұл шынымен маңызды. Неге, өйткені біздің студенттердің көпшілігі түрік, қазақ, орыс, ағылшын тілдерін меңгереді. Бұл олардың мамандығына қарамастан жұмыс табуына мүмкіндік береді. Біздің мақсатымыз – осы тілдерді одан әрі дамытып, білім сапасын одан әрі арттыру. Заманауи құрал-жабдықтармен әлемнің кез келген жерінде жұмыс істей алатын білікті мамандарды дайындау» деді.