Түркиядағы мұнай өңдеу зауытында жарылыс болды
Түркияның Измит қаласында орналасқан TÜPRAŞ мұнай өңдеу зауытында кеше түсте жарылыс болды. Жарылыстан кейін аймақта сиреналар естілді.
Кеше жергілікті уақыт бойынша сағат 13:00 шамасында TÜPRAŞ мұнай өңдеу зауытында жарылыс болып, кейін қара түтін көтерілді. Оқиға орнына медицина қызметкерлері мен полиция қызметкерлері жедел жеткен. Зауыт өкілдерінің айтуынша, жарылыс салдарынан болған өрт толығымен сөндірілді.
Коджаэли қалалық муниципалитетінің мэрі Тахир Бююкакынның мәлімдеуінше, жарылыс жоспарланған жаттығу кезінде болған. Оқиға салдарынан зардап шеккендер жоқ. Жарылыстан кейін зауыт аумағынан өрт шықты. Билік мәліметінше, ол тез арада ауыздықталып, бақылауға алынды.
Қазіргі кезде зауыт мамандары мен қауіпсіздік қызметі болашақта мұндай оқиғалардың алдын алу үшін жарылыстың нақты себебін анықтап жатыр. Зауыттағы жағдай қалыпқа келтірілді, кәсіпорын жұмысы штаттық режимде жалғасады.
