Ақтау қаласы түркі әлемінің мәдени астанасы мәртебесін алатын 2025 жылғы іс-шараларды ұйымдастыру үшін одан әрі ынтымақтастық орнатуға ерекше назар аударылды. Бұл туралы Маңғыстау облысы әкімдігінің баспасөз қызметі хабарлады.
Өңір басшысы Нұрлан Ноғаев ТҮРКСОЙ Бас хатшысы Сұлтан Раевпен кездесті. Ақтау қаласының әкімі Ұлықбек Тналиев кездесуге қатысушыларды 2025 жылға арналған іс-шараларды алдын-ала жоспарымен таныстырды.
Жыл бойы ұйымға мүше елдер достық пен ынтымақтастықты нығайту мақсатында Каспий теңізінің жағасына жиналып, түрлі іс-шаралар өткізбек.
«Шушада (Әзірбайжан) өткен ТҮРКСОЙ Түркі мәдениеті мен өнерін дамыту жөніндегі халықаралық ұйымға мүше мемлекеттердің 40-шы отырысында Ақтау қаласы 2025 жылы Түркі әлемінің мәдени астанасы болады деген маңызды шешім қабылданды. Бұл айтарлықтай жетістік, сондықтан, біз қазірден бастап әртүрлі мәдени және спорттық іс-шараларға белсенді түрде дайындалып жатырмыз. Мәселен, Ақтауда классикалық және халық музыкасының концерттері, фотосуреттер мен картиналардың көрмесі, театр труппаларының, музыкалық және би ұжымдарының, сондай-ақ түркі әлемінің басқа да өнер өкілдерінің фестивальдері өтеді деген жоспар бар. Біз сондай-ақ халықаралық шығармашылық шеберлік сабақтарын, шығармашылық кездесулерді, ұлттық спорт түрлері бойынша жарыстар мен тағы да басқа шаралар өткізуді жоспарлап отырмыз. Біздің мақсатымыз — әлемге түркітілдес елдердің мәдени мұрасының байлығын көрсету және халықтарымыз арасындағы достық пен ынтымақтастықты паш ету. Бұл бір жағынан Ақтау қаласы үшін туризм мен кәсіпкерлікті дамытуда жаңа серпін алудың бірегей мүмкіндігі болса, бір жағынан ұйымға мүше елдер біздің ғажап өлкемізге келіп, оны өз көзімен көре алады. Біздің аймақта қызықты және ғажайып нәрселер көп, және біз оны әлемге паш етуді мақтан тұтамыз», — деді Ұлықбек Тналиев.
ТҮРКСОЙ Бас хатшысы Сұлтан Раев Ақтау қаласының түркі әлемінің астанасы ретінде таңдалуы кездейсоқ емес екенін, бұл аймақ өзінің киелі және тарихи орындарымен танымал екенін атап өтті.
«Маңғыстау – өзінің қасиетті орындарымен әйгілі бірегей, ерекше аймақ. Бұған дейін Қазақстандағы түркі әлемінің мәдени астаналары Астана мен Түркістан болған. Ақтауда бұл жыл абыроймен өтетініне сенімдімін. Әлемдік қоғамдастық түркі дәстүрлерінің не екенін және бауырлас халықтарымызды не біріктіретінін көріп, біле алады. Біздің міндетіміз — бүкіл әлемде ортақ түркі мәдениетін сақтау және насихаттау», — деді Сұлтан Раев.
Маңғыстау әкімі Нұрлан Ноғаев өңір үшін қонақтарды қабылдау және осындай жоғары деңгейдегі іс-шараларды ұйымдастыру үлкен мәртебе екенін атап өтті.
«Бұл іс — шара қалалық деңгеймен шектелмейді, бұл – өзімізді әлемдік аренада түркітілдес елдер ретінде көрсетуге мүмкіндік беретін әлемдік ауқымдағы іс-шара. Біз қонақтарды ата-бабамыздан қалған қонақжайлық пен мәдени мұрамызды көрсете отырып қарсы алуға, халықтарымыз арасындағы байланыс пен өзара түсіністікті нығайтуға үлес қосуға дайынбыз», — деп атап өтті Нұрлан Ноғаев.
ЮНЕСКО Түркі әлемі деп аталатын ТҮРКСОЙ халықаралық ұйымы 1993 жылы Әзербайжан, Қазақстан, Қырғызстан, Өзбекстан, Түрікменстан және Түркия Республикасының мәдениет министрлерінің келісімі нәтижесінде құрылды.
ТҮРКСОЙ түркі халықтарының ортақ материалдық және мәдени ескерткіштерін сақтау, дамыту және болашақ ұрпаққа беру үшін ынтымақтастық мақсатында түркі елдері мен өңірлерін біріктіреді.
