Ақпарат министрі: TikTok-пен балалар құқықтарына қатысты келіссөз бастадық
Ақпарат және қоғамдық даму министрі Дархан Қыдырәлі, TikTok-пен балалар құқықтары және басқа да мәселелер бойынша келіссөздерді бастағанын айтты деп хабарлайды Turanews.kz.
Форумда сөз сөйлеген Қыдырәлі, қазақ тілінде контент жасаушылардың VI форумында онлайн платформалардағы қазақша контенттің үлесі 87 пайызға жеткенін айтты.
«Үшінші бағытымыз – қазақ тілді контентті дамыту. Бұл бағытта жаңа айтып кеткен доктрина бойынша нақты шаралар жоспарын бекіткенбіз. Қазіргі кезеңде қазақ тілінде мемлекеттік БАҚ-тағы орташа статистика – 85 процент. Біз мұны тағы да арттыруды көздеп отырмыз. Әсіресе онлайн платформаларда 87 процентке дейін (қазақ тілінде контент -ред.) өсті. Саны да, сапасы да артып келеді. Сондықтан жалпы мына креативті индустрияға, сериалдарға, басқа да өнімдерімізге ішкі нарықта ғана емес, сыртта да сұраныс көп», — деді министр.
Оның сөзінше, бұл саладағы әлемнің алпауыт компаниялары Қазақстан нарығына қызығушылық танытып отыр.
«Соның ішінде өкілдіктерін ашу мәселесі, Қазақстанда тіркелу, интерфейстерін қазақшалау мәселесі шешімін тауып жатыр. Мысалы TikTok біздің ұсынысымыз бойынша интерфейсін қазақшалады. Жалпы TikTok-пен балалар құқықтары, басқа да мәселелер бойынша келіссөздерді бастап кеттік.
Мамыр айының соңында жаңа медиа форумын өткіземіз. Соған баршаңызды шақырамыз. Ол жерде біз жасанды зейін жөнінде кеңірек әңгімелейміз деп ойлаймын», — деді министр.
