Қытай қорғаныс саласына бөлінетін қаражатты ұлғайтпақ

Қытай үкіметі 2023 жылы ұлттық қорғаныс шығынын 7,2%-ға, 1 553 трлн юаньға (шамамен $224 млрд) дейін арттыруды жоспарлап отыр, деп хабарлайды Turanews.kz ҚазАқпарат агенттігіне сілтеме жасап.

«Ұлттық қорғаныс саласының шығыны 1 553 трлн юаньға жетіп, өсім 7,2% болады», — делінген Қытайдың бюджет баяндамасында.

2022 жылы ҚХР қорғаныс бюджеті 7,1%-ға, 1 451 трлн юаньға дейін, ал 2021 жылы 6,8%-ға, яғни 1 356 трлн юаньға артқан болатын. Оған қоса 2023 жылы қоғамдық қауіпсіздікті қамтамасыз ету шығыны 6,4%-ға, 208 972 млрд-қа көбейеді.

Сондай-ақ биыл білім беру шығыны 2%-ға артып, 155 479 млрд юань болса, ғылым мен техника шығыны 2%-ға өсіп, 328 034 млрд юаньді құрайды. Астық, май және басқа да материалды ресурстар қорын жасауға 132 878 млрд юань бөлінеді, өсім — 13,6%; борыштық міндеттемелер бойынша пайыздарды төлеуге арналған шығыс – 723 млрд юань болады, ол былтырғы жылдың көрсеткішімен салыстырғанда 10,8%-ға артық.

Бейжіңде жексенбі күні Жалпықытайлық халық өкілдері жиыны (ҚХР парламенті) 14-шақырылымның бірінші сессиясы ашылды. Ол 13 наурызға дейін жалғасады.