YTTBning O‘zbekistonga kiritgan sarmoyalari 900 mln dollarga yetdi
2022-yilda Yevropa tiklanish va taraqqiyot banki (YTTB) O‘zbekistondagi 26 ta loyihaga qariyb 900 million dollar investitsiya kiritdi. Bu haqda bankning matbuot xizmati xabar berdi.
Ma’lumotlarga ko‘ra, bu orqali O‘zbekiston ketma-ket uchinchi yil Markaziy Osiyodagi eng ko‘p mablag‘ olgan mamlakatga aylandi.
Ushbu moliyalashtirish dasturlari orqali, qayta tiklanadigan energetikadan tortib bank faoliyatiga bog‘liq bir qancha sohalarga investitsiyalar kiritildi.
Bankning mamlakatga yillik sarmoyasi bo‘yicha avvalgi rekord 2021-yilda o‘rnatilgan — 690 million dollar.
YTTB Buxoro viloyatida umumiy quvvati 1 GVt bo‘lgan ikkita shamol elektr stansiyasini qurish va ishga tushirishga ko‘maklashish uchun umumiy qiymati 520 million dollarga teng ikkita sindikatlashtirilgan kredit ajratdi.
Ushbu moliyalashtirish YETTBning o‘z mintaqalari bo‘ylab hozirgi kunga qadar qayta tiklanadigan energiya bo‘yicha eng yirik loyihasidir.
Bank O‘zbekistonning Navoiy viloyatida quvvati 500 MVt bo‘lgan yashil maydon shamol elektr stansiyasini rivojlantirish, qurish va foydalanish uchun 74 million dollar miqdorida moliyalashtirish paketini tashkil qildi.
Elektr stansiyasi ishga tushirilgach, yiliga 545 million kub metr tabiiy gaz tejaladi va karbonat angidrid chiqindilarini yiliga 1,1 million tonnaga kamaytirib, yiliga 500 ming xonadonning iste’moliga teng bo‘lgan 1,6 milliard kVt/soat elektr ishlab chiqarishni ta’minlaydi.
Energetika sektoridan tashqari YTTB Xorazm va Qoraqalpog‘istonda qattiq maishiy chiqindilarni boshqarish uchun mas’ul bo‘lgan hududiy kommunal xo‘jalik korxonalari uchun umumiy qiymati 120 million dollargacha bo‘lgan uzoq muddatli suveren kreditlar ajratdi.
Loyiha O‘zbekistonda dekarbonizatsiya sa’y-harakatlariga hissa qo‘shadi va qattiq maishiy chiqindilarni boshqarish bo‘yicha milliy strategiyani qo‘llab-quvvatlaydi.
Moliya sohasida YTTB “Asakabank”, “Ipoteka-bank” va SQB banki uchun 210 million dollar miqdoridagi yangi savdoni moliyalashtirish limitlarini oshirdi.
Bitim xususiy mahalliy tadbirkorlik subyektlariga, jumladan, kichik korxonalarga zarur tovarlar, xizmatlar va uskunalarni import qilish hamda o‘z mahsulotlarini eksport qilish imkonini beradi.
YTTB tomonidan Ipak Yo‘li bankiga taqdim etilgan 10 million dollarlik moliyaviy paket mahalliy uy xo‘jaliklari, kichik va o‘rta korxonalar uchun yashil texnologiyalardan foydalanishni yaxshilaydi va ayollar tadbirkorligini rag‘batlantiradi.
Bugungi kunga qadar YTTB butun mamlakat bo‘ylab 128 ta loyihaga deyarli 3,9 milliard yevro sarmoya kiritdi.
